30.3.11

出售雪梨紙


由於買錯顏色
有 150 張湖水綠雪梨紙出售
Size 係 20"x30"
顏色係 18 號 (第四張圖 1 至35號中的18號)
我只收回成本價 唔想浪費左 d 紙
有意 email: kiroroho@gmail.com

k

搜場記 - 月滿圓

最近實在變態的忙。夠膽死做足12小時返到屋企食完飯就要訓。真是辛苦晒k最近忙碌地upload多篇blog。在此先行謝過。

雖然搜場時間已過,但這個場比較特別所以點都想介紹下。月滿圓位於利舞臺廣場十九樓。一聽個名已知不是普通酒樓。再到website 看看,嘩!有得跳舞家喎!

IMG_1387

這個便是大廳中間的舞池。如果只擺十六七圍,這個位置可留來跳舞。(有live band 送的)不過要擺廿三四圍的我們,經理說要在舞台位置鋪上地毯用埋來放餐檯,so sad。

IMG_1390另一大賣點就入口,大家所見的五個燈箱其中一個可換成主人家的相片,當然換埋五張都可以啦(都係錢的問題)。加埋張圓型梳化,真係型爆。

IMG_1393另外正門外有幾張平時用來放menu的架亦可換埋做主人家的照片。油畫架可以慳埋。

IMG_1392正門。

IMG_1388

另外吸引我的是餐檯顏色以深紅及黑色為主,不是一般紅呀金呀或是粉色系列。而每席消費約七千左右,於銅鑼灣來說,價錢絕對合理。另外如擺名23圍酒樓會送5堂(定3堂?已忘了)跳舞堂。個package 真係夠晒特別。

走型格路線的朋友絕對可考慮一下這個場。

s

27.3.11

Pom Pom DIY

由於同 s 唔想擺太多錢係 decoration,所以就有幾樣野想 DIY。今日就同 s 試整 Pom Pom,真係好似做工廠妹咁。係咁摺,係咁 cut。整一個都用好多時間。


首先要準備架生啦!都係剪鉗、尖咀鉗、cutter、間尺、鐵線同熱溶膠槍。


仲有 tissue paper 同 foam ball。我既 tissue paper 就買錯左色,嫩綠變左大綠,淘寶買係咁上下。

今次試做剪左 5" x 10",6 張一組,跟住就摺 22 摺,再繞鐵線。


繞實左就剪兩頭,剪圓 D。


之後就張 tissue paper 逐張向上反,由於唔記得影,就偷偷圖先。

偷圖
偷圖

之後就再篤落個波度,再用熱溶膠固定,搞掂!


明明係綠色,整完出黎變左 tiffany 藍,又 ok wor。

Useful link

k

21.3.11

+M by CM Leung送5萬元婚照

同千嬅影結婚相既 CM Leung 免費幫你係吉隆坡拍 25 張婚照
不過其他野當然全部唔包啦
快 d 張你地既愛的故事 send 去參加啦!!!



k

18.3.11

擇日?


其實如果你叫我去擇日,我就會覺得你同尋日去搶鹽個 d 人一樣咁無知。當然我咁講會得罪好多人,因為這涉及宗教信仰、風土習俗。由其是中國以農立國既社會,習慣將所有解釋唔到既野歸於天理,所以中國人既社會特別迷信。上網睇各大 forum,發現老人家通常都要擇日,好彩我地既四大長老比較新潮,我地擇唔擇日都冇所謂。

其實做咩有感而發呢?事緣上星期兩老去遠房親戚既婚宴,席上談及我們沒有擇日,親戚們大表驚訝表示,點可能唔擇日!其實大家知唔知點解要擇日,擇日又點黎?

我地宜家擇日用既通勝,古時叫黃曆,相傳是由黃帝創制,故稱為《黃曆》。由欽天監計算頒訂,因此也稱皇曆。其內容指導農民耕種時機。民間俗稱為通書。但因通書的「書」字跟「輸」字同音,因避忌故又名通勝。民國之後則是由五術、擇日師排出「通書」,各地命相師可掛上各家堂號另行出版,或賣出版權由公私機關印行當贈品。香港流行的源頭則是廣東「崇道堂」羅傳烈通書。

咁你又估下結一次婚要擇幾多次日?
係十一次:納采、問名、納吉、納徵、請期、親迎、裁衣、安床、合帳、開容、納婿

咁你又知唔知擇日有咩禁忌?
盲年、犯太歲年、單月、三月(清明)、七月(盂蘭節)、九月(重陽)、六月(半世夫妻)、"雙方父母、兄弟姊妹、自己"生日之月、祖宗生死忌之月、三娘殺、大時大節通通通不用。

咁即係邊幾個月結得婚呢?
二、四、八、十及十二月,如果雙方家長、兄弟姊妹、自己生日之月,同祖宗生死忌之月撞晒呢幾個月點算。咁冇辦法啦!你地八字唔夾,有緣無份啦。

如果你真係咁迷信,我想話你聽做以下既事都係須要擇日架:
移徙、入宅、破屋壞垣、拆卸、修造、動土、起基、架馬、蓋屋、安門、垣牆、賓士道塗、伐木、開柱、定粱、豎柱上粱、作灶、安修廚灶、安磨、作廁、造倉、齋醮、造廟、修倉、補垣塞穴、補垣牆、置產、買宅受田、造橋、開渠、穿井、開池、作陂、放水、築堤、分居、進入口、剃頭、整手足甲、沐浴、掃舍宇、療目、針刺、入學、冠笄、會親友、進壽、上官赴任、出行、訴訟、祭祀、安葬、祈福、開光、入殮、破土、栽種、開市、移柩、立卷、交易、求嗣、納財、修墳、掛匾。

實情係現代人結婚大都化繁為簡,你唔見個個朋友擇親日都係公眾假期黎既?你話宜家擇日有幾認真呀!

k

證婚場地 - 伯大尼小教堂@薄扶林


冇錯又係我寫 blog,不過 s 真係好忙,我呢 d 御用閒人梗係要更加落力 d 搞啦。(其實都冇咩搞)

伯大尼小教堂位於薄扶林,係我一直以來既夢想證婚場地。因為我真係好鍾意教堂既莊嚴及神聖既氣氛,加上伯大尼小教堂屬政府管理,冇任何宗教信仰既新人都可以在這裡證婚。不過與 s 參與過一兩趟教堂婚禮後,都認為一個冇宗教信仰既教堂婚禮係好奇怪既一件事。所以最後放棄。


伯大尼小教堂前身為休養所,現時由 APA 管理。小教堂與包玉剛堂可租予公眾使用,其他地方作教學用途。

莊嚴既小教堂

包玉剛堂

除了證婚的小教堂外,主建築的屋頂便是包玉剛堂。本身地方裝修簡潔,全玻璃設計,有戶外露台,係擺 cocktail 既好地方。

伯大尼小教堂係去數碼港必經之路,其實如果唔嫌遠,可以先到伯大尼證婚,再到數碼港擺酒,當日既行程就好鬆動。

k

17.3.11

證婚場地 - 伊甸園 Glass Chapel@九龍塘


睇個晒 d 酒樓之後,我地就去睇下證婚既場地。由於 s 覺得係邊度證婚都 ok,以我本來唯一喜歡既證婚場地俾我自己 ban 左,所以我地都係求其望下算啦。由於我較喜歡有陽光氣息既地方證婚,所以我就一心想去睇下伊甸園既玻璃教堂。

入面太細,只可以容納三十多人,但大部份要企

其實外面設計較求其

可以用雜亂黎形容

旁邊可擺十多圍酒席

位於九龍塘的 Glass Chapel,個 Chapel 本身真係好靚,略嫌細少及多塵(d 玻璃好鬼多塵,但係影相睇唔到的)。不過真係有去左 Bali 個 D feel。不過除左教堂外,其實佢裝修都幾亂,林園佈局好鬼求其。 似起左個教堂後,冇錢裝修其他地方。另外教堂較細,兄弟姊妹四大長佬,攝影師及律師走晒入去之後,相信都冇咩位淨。不過影相靚就夠晒啦!

還要注意佢係冇泊車位既,希望你唔好太多親朋戚友揸車,如果唔係門口附近真係好難搵位。如果你識路的話,地方唔算難搵,15-20 分鐘左右行到旺角火車站。(不過我諗冇人會 well dressing 咁行街掛) 如果想細攪行禮 + Cocktail,呢度可以考慮。

k

16.3.11

搜場記 - 姬子皇朝@數碼港


一聽到數碼港真係覺得勁隔涉,不過當你試過係銅鑼灣用十五分鍾入到數碼港,又唔係好遠。其實一路都唔知有呢個場地,不過係 expo 行下行下,發現姬子皇朝 display 既相真係好靚,所以一於決定走去數碼港望下。

講佢有幾靚之前,不如講下佢有咩係冇:
  1. 冇追燈 (宜家有個臨時既,不過要租)
  2. 冇現場直播系統,即係唔可以播 live 畫面
  3. 冇台, 只有一個高一級既細台 (如果你多過廿四圍既話,開左席之後細台係影唔到相既)
  4. 新娘房冇洗手間
  5. 只得一個 100 寸平幕 (完全張開的話會閘到主家席/擺廿六圍的話)
不過佢有咩呢,不如直接睇相。

大堂吊燈

Reception 及證婚大堂

門後就係大禮堂

西色裝修

高樓底無柱

100 寸平幕

我諗睇完相,好多人心動,不過一提到係數碼港,一定好多人打退堂鼓。話說回來,係香港人方便慣,先會嫌地方遠。另外我發現香港人出席婚禮,覺得係俾人炸,而唔係分享你婚禮既喜悅。比著外國甚至內地,出席一個婚宴除了穿州過省,很可能還要住一晚呢?

k

LinkWithin

Related Posts Plugin for WordPress, Blogger...